కాశ్మీరి కవిత్వం 4

కాశ్మీరి కవిత్వం 4
1. పచ్చబొట్లు, నిబద్దతలు Tattoos & Commitments by Abishake Koul
ఆమె యవ్వనంలో ఉన్నప్పుడు కలిసాను
చినార్ ఆకును పచ్చబొట్టుగా వేయించుకొంది
ఆ ఆకుకు బుల్లెట్ రంద్రం ఉండేది
ఇప్పుడా పచ్చబొట్టు ఆకు కూడా వడిలిపోయింది

ఆమె దేహాన్ని రాసుకు తిరిగిన
తుపాకులగురించి మాట్లాడేటపుడు
ఆమె స్వరం గద్గదమైంది
వేలిపై వేయించుకొన్న ఆజాదీ అక్షరాల
పచ్చబొట్టును చూపించింది ఆమె.
2. వలస పోవటం - Abandonment by Daaniyal Hassan
శ్రీనగర్ ఎయిర్ పోర్టులో
ఎదురుచూసే ఫర్నిచర్ కి వేళ్ళు పెరిగి
మంచునేలలోకి చొచ్చుకుపోయాయి.
చెక్కపై ద్రాక్ష లతల్ని చెక్కిన
వడ్రంగి పదునైన ఉలి
నా అరచేతిపై ఏవో గీతల్ని మెత్తగా చెక్కుతుంది
మంచుతో కప్పబడిన తలుపులు తోసుకొని
జ్ఞాపకం ప్రవేశిస్తుంది తిరిగి వెళిపోవటానికి
ఈ మట్టిలో కూరుకుపోయిన నా కాళ్ళు, చేతులకు
ఈ నిష్క్రమణ కదలిక తెస్తుంది.
నన్నిక్కడనుంచి బయటకు మోసుకువెళ్ళటానికి
ఎంత బలమైన పాదాలు కావాలీ?
నా పాదముద్రలు వీధులలో శిధిలమౌతాయి మెల్లమెల్లగా
నా ధైర్యాన్నంతా గుప్పెట్లో పెట్టుకొని
మరో ఇల్లులేనితనం లోకి వలస పోవాలి
మా హృదయాలు అగ్నికి ఆహుతి అయ్యాకా
మిగిలిన బూడిద రూపమే
రన్ వే పై పరచుకొన్న ఈ వలస పొగమంచు
మేం కోల్పోతున్న మా మాతృభూమి స్పర్శ వెనుక
అస్థిపంజరాల వరుసలు,
చరిత్రతో, యుద్ధంతో తుప్పు పట్టిన ఇంటి రేకులు,
మిగిలినవన్నీ ఉత్త ఖాళీ మేఘాల జ్ఞాపకాలు
మూడు సార్లు విమానాలు కాన్సిల్ అయ్యాయి
'ఎవరో కుట్రలు చేస్తున్నారు' అంటుంది అమ్మ
మరో ఆరు ఇంచుల మంచు పెరిగి
నాళాలలో ఇంధనం గడ్డకట్టి
విమానాల గుండెలు ఆగిపోయాకా
ఒక్క విమానం కూడా ఎగరదు
అమ్మ ఎన్ని పూజలు చేసినా
వాటి ఇనుప రెక్కలు నిర్దయగా నిలిచిపోతాయి
మృత్యువు వదంతిలా వ్యాపిస్తుంది.
దేశ బహిష్కృతునికి అంతిమ సంస్కారాలు
ఎవరు చేస్తారూ?
అనుసృజన - బొల్లోజు బాబా