Ideologies

మొన్నొక సాహిత్యసభ ముగిసాకా వెళిపోతున్న మిత్రుణ్ణి "ఉండండి సరదాగా కాసేపు మాట్లాడు కుందాం" అన్నాను.

సూర్యకళా మందిరంలో హరికథా వారోత్సవాలు జరుగుతున్నాయి. అక్కడకు వెళ్ళాలి అన్నాడు.

మీరు కమ్యూనిష్టు భావజాలం కలిగినవారు (కొన్నాళు అన్నలతో కలిసి అజ్ఞాతంలో ఉన్నారు) కదా హరికథలకు ఎలా వెళతారు. మధ్యమధ్యలో "శ్రీమధ్రమారమణగోవిందా" అని కూడా అంటారా అని- వారిని వేళాకోలం చేసాను కొంచెంసేపు ఉంటారని.

హరికథలు వినటం నాకు ఇష్టం. అదొక కళారూపం. అలాగని నా భావజాలాన్ని నేను మార్చుకోను. దాని దారి దానిదే, దీనిదారి దీనిదే అన్నాడతను.

నిన్నో మొన్నో "You are what you are by your choices. I believe choices are above any ideologies. Keep living rather than following" అని ఒకచోట నే చేసిన కామెంటు గుర్తుకొచ్చింది.

కొన్ని దృక్ఫధాలు ఈ సమాజానికి మేలు చేస్తాయని నమ్ముడం వాటిని మనసావాచాకర్మణా ఆచరించటం ఉత్తమ విలువ. పాతవాటిని కూలదోస్తే కానీ కొత్తవి నిర్మించలేం అన్నది కూడా వాస్తవమే.

ఒక ఆల్టర్నేటివ్ ని సృష్టించకుండా కానీ పాతవాటిని కూలదోయాలని ఆశించటం/శాసించటం- ఆ దృక్ఫథ సానుభూతిపరులను ట్రోలింగ్ చేయటంగా మిగిలిపోతోంది. ఇది శోచనీయం.

కళలకు సంబంధించినంతవరకూ నేను నమ్మే సిద్ధాంతాలతోపాటూ నా ఇష్టాలు కూడా పక్కపక్కనే ఉంటాయి. ఎందుకంటే నేను పెరిగిన వాతావరణం, నా కుటుంబం, నా సన్నిహితుల అభిప్రాయాలకు అనుగుణంగా నా ఇష్టాలు ఏర్పడ్డాయి. నా బుద్ది విస్తరించాకా జీవితం పట్ల కొన్ని సిద్ధాంతాలను/దృక్ఫధాలను ఏర్పరచుకొన్నాను. ఈ రెంటిసంగమమే నా నడకా, నడతా, జీవితమూను.

అందుకే అన్నమయ్య గీతాలు, ఎమ్మెస్ సుబ్బలక్ష్మి దుఃఖస్వరం, కూచిపూడి నాట్యాలు, కృష్ణశాస్త్రి గీతాలు, జాషువా పద్యాలు, ఇళయరాజా, గోరటి వెంకన్న, గద్దర్ పాటలు, దైవభక్తి అన్నీ ఉంటాయి.

వాటిలో కొన్ని సోకాల్డ్ బ్రాహ్మణీయభావజాలాన్ని ప్రతిబింబించేవి కావొచ్చు. కానీ బ్రాహ్మణీయభావజాలం అంటే బ్రాహ్మణుల భావజాలం కాదని నేను విశ్వసిస్తాను. అది ప్రతిమనిషిలో ఉండే- నా సంస్కృతి, నా అభిరుచులు గొప్పవనే ఆధిపత్యభావజాలం. ఇది సమాజంలో పైనుంచి క్రిందిస్థాయి వ్యక్తులందరిలోనూ ఉంటుంది. ఎవరికీ మినహాయింపులుండవు. అలాంటి అభిప్రాయాల్ని ఒక్కసారిగా సమూలంగా తొలగించటం అంటే దాదాపు మనుషులందరి రక్తమాంసాల్ని తొలగించటం అంత కష్టం నేడు.

"“మార్పు అనేది ముగ్గగానే రాలిపడే పండు కాదు, మనమే దానిని రాల్చాలి” అన్న
చే గెవారా మాటలు వినటానికి బాగుంటాయి కానీ ఆచరణలో మాత్రం మార్పు అనేది "మనుషుల లోలోపలనుంచి రావాలి" బయటనుంచి కాదు.

బొల్లోజు బాబా