ఇద్దరు ఆటగాళ్ళు
బూరా ఊదుతున్నారు
బుట్టలోని తాడు దానంతట అదే
పడగవిప్పి
తోకపై నిలుచున్న రాచనాగులా
గాల్లోకి లేచింది
జనం చప్పట్లు కొట్టారు
మరో ఆటగాడు
ప్రజలకు అభివాదం చేసి
నిలుచున్న ఆ తాడుని
ఎక్కడం ప్రారంభించాడు
క్రమక్రమంగా
మసకచీకట్లోకి కనుమరుగయ్యాడు
కాసేపటికి
మాంసం కండలు, రక్తం చినుకులు
వర్షించాయి ప్రజలపై
తాడు ముడుచుకొంటూ బుట్టలోకి చేరింది.
"భలే కనికట్టు... భలే కనికట్టు" అంటో
మరలా తప్పట్లు కొట్టారు ప్రజలు.
జోలెనిండా కాసులు నిండాయి.
అది కనికట్టుకాదనే
వాస్తవం ఎరిగిన ఆ ఇద్దరూ
లోలోపల నవ్వుకొంటున్నారు.
బొల్లోజు బాబా
No comments:
Post a Comment