పర్యావరణం

కప్ప దమనీ వ్యవస్థ డిసెక్షన్

విద్యార్ధులకు డిమానుస్ట్రేషన్ క్లాసది.

క్లోరోఫాం ఇచ్చిన కప్పను

డిసెక్షన్ చెక్కపై ఉంచి

కదలకుండా కాళ్ళకు మేకులు కొట్టాను.

నా చుట్టూ విద్యార్ధులు నిల్చొని

శ్రద్ధగా గమనిస్తున్నారు.

సిజర్ తో చర్మాన్ని కొద్దికొద్దిగా తొలగిస్తూ

స్టెర్నమ్ ఎముకను కత్తిరించి

ఉరఃకుహరాన్ని బయల్పరిచాను.

“మీ చేతులు వణుకుతున్నాయి సార్”

అన్నాడో విద్యార్ధి.

అప్పుడు గమనించాను

నా చేతులు విపరీతంగా వణుకుతున్నాయి.

మిగిలిన డిసెక్షన్ వెంటవెంటనే ముగించి

వచ్చేవారం మీరు చేద్దురుగాని అని చెప్పి

డిపార్ట్ మెంటుకు వచ్చేసాను.

భయమేసింది జబ్బేదైనానా అని.

కాగితం తీసుకొని నా పేరు వ్రాసుకొన్నాను

ముత్యాల్లాంటి అక్షరాలు

కొంచెం ధైర్యం వచ్చింది.

*****

విద్యార్ధుల ఒక్కొక్కరి ట్రేలో ఒక్కో కప్ప

వాళ్ళు జాగ్రత్తగా డిసెక్షన్ మొదలుపెట్టారు.

కాసేపయ్యాకా చూద్దును కదా

ప్రతి ఒక్కరి చేతులూ వణుకుతున్నాయి

అలా వణుకుతున్న చేతులతోనే

అందరూ డిసెక్షన్ చేస్తున్నారు – ఆశ్చర్యంగా!

*****

నిన్నరాత్రి

చెరువుగట్టుపై మిడతలు వాలినపుడు

గరికపూలు అలానే వణికుంటాయి.

బొల్లోజు బాబా

రావిశాస్త్రిగారి రచనాసాగరం చదూతున్నాను.  చాలా బాగుంది.  మూడార్ల గూఢచారి పేరుతో రావిశాస్త్రి గారు స్వాతి లో వ్రాసిన చిన్న చిన్న పిట్టకథలు ఒక్కొక్కటి ఒక్కో కవితలా అనిపించాయి నాకు.  మచ్చుకు రెండు.......

మహాత్మాగాంధీగారు మనకి మరీమరీ

చెప్పిన మూడు చీనా కోతుల్లోనూ,

ఒకటి పాపం చూడదు,

మరొకటి పాపపుమాట వినదు,

ఇంకొకటి పాపాన్ని పలుకదు!!!!

బాగానే ఉంది, కానీ చిన్న పేచీ ఉంది-

చూడనిది వినొచ్చు, పలకొచ్చు,

విననిది చూడొచ్చు, పలకొచ్చు

పలకనిది కళ్ళారా చూడొచ్చు, చెవులురిక్కించి వినొచ్చు.

పాపం చూడనిదీ, విననిదీ, పలకనిదీ కూడా పాపం చెయ్యొచ్చు.

శ్రీ రాచకొండ విశ్వనాధశాస్త్రి – స్వాతి, మార్చి 1979

పేదరికం కారణంగా చాలా జబ్బులు పుడతాయి- అనిచెప్పి,

ఓ రాజుగారు తన ఒక్కగాని ఒక్క కొడుక్కి

పేదవారి జబ్బులు తగలకుండా

ఆ కుర్రవాణ్ణి ఓ ఒంటిస్తంభం మేడలో ఉంచి పెంచాడు

కాని,

ఆ కుర్రవాణ్ణి కొంతకాలానికి పెద్దరోగం పట్టుకొంది

కారణం?

ఆ పిల్లడి పరిచారిక ఒంటిస్తంభం మేడలో పెరగలేదు

అయితే

కొందరే బాగుండడం కుదరదని రాజుగారికి తెలిసొచ్చిందా?

తెలిసింకా రాలేది అనుకుంటాను

శ్రీ రాచకొండ విశ్వనాధశాస్త్రి – స్వాతి, ఫిబ్రవరి 1979

భవదీయుడు

బొల్లోజు బాబా

రావిశాస్త్రి కవితలు

రావిశాస్త్రిగారి రచనాసాగరం చదూతున్నాను.  చాలా బాగుంది.  మూడార్ల గూఢచారి పేరుతో రావిశాస్త్రి గారు స్వాతి లో వ్రాసిన చిన్న చిన్న పిట్టకథలు ఒక్కొక్కటి ఒక్కో కవితలా అనిపించాయి నాకు.  మచ్చుకు రెండు.......

మహాత్మాగాంధీగారు మనకి మరీమరీ

చెప్పిన మూడు చీనా కోతుల్లోనూ,

ఒకటి పాపం చూడదు,

మరొకటి పాపపుమాట వినదు,

ఇంకొకటి పాపాన్ని పలుకదు!!!!

బాగానే ఉంది, కానీ చిన్న పేచీ ఉంది-

చూడనిది వినొచ్చు, పలకొచ్చు,

విననిది చూడొచ్చు, పలకొచ్చు

పలకనిది కళ్ళారా చూడొచ్చు, చెవులురిక్కించి వినొచ్చు.

పాపం చూడనిదీ, విననిదీ, పలకనిదీ కూడా పాపం చెయ్యొచ్చు.

శ్రీ రాచకొండ విశ్వనాధశాస్త్రి – స్వాతి, మార్చి 1979

పేదరికం కారణంగా చాలా జబ్బులు పుడతాయి- అనిచెప్పి,

ఓ రాజుగారు తన ఒక్కగాని ఒక్క కొడుక్కి

పేదవారి జబ్బులు తగలకుండా

ఆ కుర్రవాణ్ణి ఓ ఒంటిస్తంభం మేడలో ఉంచి పెంచాడు

కాని,

ఆ కుర్రవాణ్ణి కొంతకాలానికి పెద్దరోగం పట్టుకొంది

కారణం?

ఆ పిల్లడి పరిచారిక ఒంటిస్తంభం మేడలో పెరగలేదు

అయితే

కొందరే బాగుండడం కుదరదని రాజుగారికి తెలిసొచ్చిందా?

తెలిసింకా రాలేదనే అనుకుంటాను

శ్రీ రాచకొండ విశ్వనాధశాస్త్రి – స్వాతి, ఫిబ్రవరి 1979

భవదీయుడు

బొల్లోజు బాబా

ఫ్రెంచిపాలనలో యానాం పుస్తక సమీక్ష

ఫ్రెంచిపాలనలో యానాం పుస్తక సమీక్ష
జనమిత్ర పత్రిక లో వచ్చిన నా పుస్తక సమీక్ష

భవదీయుడు
బొల్లోజు బాబా

Breakfast - by Jacques Prévert

నాతో ఏమీ మాట్లాడకుండా

అతను డికాక్షన్ ను

కప్ లోకి తీసుకొన్నాడు

అతను ఆ కాఫీ కప్ లోకి

కొంచెం పాలు ఒంపుకొన్నాడు

అతను దానిలో

చక్కెర వేసుకొని

ఒక స్పూనుతో కలయతిప్పి

ఆ వేడి café au lait ని తాగి

కప్పు టేబుల్ పై పెట్టాడు

నాతో ఏమీ మాట్లాడకుండా

అతను ఒక సిగరెట్ వెలిగించి

పొగను రింగులుగా ఒదిలాడు

అతను సిగరెట్ నుసిని

యాష్ ట్రే లోకి విదిలించాడు

నాతో ఏమీ మాట్లాడకుండా

నన్ను కనీసం చూడకుండా

అతను లేచి

టోపీ పెట్టుకొని

బయట వర్షం వస్తున్నందున

రెయిన్ కోట్ వేసుకొని

వానలో అలా నడుచుకొంటూ

వెళిపోయాడు

ఒక్క మాటలేకుండా

నాకేసి అసలు చూడకుండానే....

నేను, నేను నా చేతుల్లో

మొఖం పెట్టుకొని

ఏడుస్తూనే ఉన్నాను.

ఫ్రెంచి కవి Jacques Prévert వ్రాసిన Breakfast  (Déjeuner du matin) కు అనుసృజన

ఈ కవితకు దృశ్యరూపాలు కొన్ని యూట్యూబ్ లో ఉన్నాయి. వాటి లింకులు

http://www.youtube.com/watch?v=fLfcDrMvlfw

http://www.youtube.com/watch?v=6Z4EAdREWsM

పైకి సాదా సీదాగా అనిపించినా ఈ కవితలో ఏదో తెలియని శూన్యతను పరాకాష్టకు చేర్చినట్టు నాకనిపించింది.

రెండో వీడియోలోని వ్యక్తులు ఇద్దరూ మగవాళ్ళు అవ్వటం గమనార్హం (కవితను చదివినప్పుడు నాకొచ్చిన సందేహం అదే. ఇది ఎవరిమధ్య జరిగిఉంటుంది అని)

తెలుగు కవితలు కూడా ఇలా వీడియోల రూపంలో కనిపించే రోజులు ఎప్పటికైనా వస్తాయని ఆశిస్తూ

భవదీయుడు

బొల్లోజు బాబా

మూల్యాంకనం

జవాబు పత్రాన్ని పట్టుకోగానే
ఓ ఏడాది కాలాన్ని
చేతిలోకి తీసుకొన్నట్లుంటుంది.
ఏదో అపరిచిత జీవితాన్ని
తడుముతున్నట్లనిపిస్తుంది.

పాస్ మార్కులు వేయమంటూ
కన్నీటి ప్రార్ధనో, వెయ్యినోటో, ఫోన్ నంబరో
లేక శాపాల బెదిరింపో వంటి చేష్టలు
బిత్తరపరచినా
ఇన్నేళ్ళ చదువులో ఎక్కడా తగలని
ఒక వాక్యమో, కొత్త కోణమో, వివరణో
తళుక్కు మన్నపుడు
కవిత్వం చదివినంత
ఆనందమౌతుంది.

జవాబు పత్రాల్ని మెదడు తూకం వేస్తే
హృదయం మూల్యాంకనం చేస్తుంది.

ఈ స్టూడెంట్ కి
మమ్మీ డాడీ దీబెట్టి బెస్టాఫ్ లక్ చెప్పారో లేదో
హైలైటర్స్, స్కెచ్ పెన్ లు కొనివ్వలేదు కాబోలు
స్కేలు కూడా లేదేమో..
పేపరు మడతే మార్జినయ్యింది.
ఈ అక్షరాలు వ్రాసిన చేయి
పొలంపనులు చేసిందో, రాళ్ళు మోసిందో
పెట్రోలు కొట్టిందో లేక అంట్లే తోమిందో
అక్షరాల నిండా మట్టి వాసన ... మట్టి వాసన...
హృదయానికి మట్టివాసన ఎంతిష్టమో!

జవాబులు సరిగ్గా రాయకపోవటానికి కారణం
ఒక్క చదవకపోవటమేనా... లేక
ఆ సమయంలో జబ్బుచేసిందా?
ముందురోజు తండ్రికి తలకొరివి పెట్టాడా?
పెళ్ళిబట్టలలో నేరుగా పరీక్షహాలుకు వచ్చిందా?
సమస్యలనుంచి రేపు పారిపోవాలనుకొంటున్నాడా?
ఖాళీ జవాబు పత్రం ప్రశ్నల పత్రమౌతుంది

పేపర్లు దిద్దటం అంటే ఒక్కోసారి
పత్రికల్లో పతాక శీర్షికలవటం కూడా
ఆత్మహత్యగానో, అత్యుత్తమ రాంక్ అనో.

బొల్లోజు బాబా

ఫ్రెంచిపాలనలో యానాం పుస్తకం గురించి

“ఫ్రెంచిపాలనలో యానాం” పేరుతో నే వ్రాసిన వ్యాస సంపుటి మొన్న ఉగాది రోజున శ్రీ యండమూరి వీరేంద్రనాథ్ గారి చేతులమీదుగా ఆవిష్కరింపబడింది.  ఆ వ్యాసాలన్నీ యానాం స్థానిక పత్రిక అయిన “జనమిత్ర” లో 2010-2011 పదినెలలపాటు సీరియల్ గా వచ్చాయి. వాటిలో కొన్నిభాగాలను ఈ బ్లాగులో కూడా ఉంచటం జరిగింది.  ఆ తరువాత వాటికి అనేక మార్పులు చేర్పులు చేసి, పుస్తకరూపంలోకి తీసుకురావటం జరిగింది. 

ఈ పుస్తకరచనకు అవసరమైన చాలా సమాచారాన్ని http://gallica.bnf.fr/  వెబ్ సైట్ నుంచి గ్రహించాను.  మరికొంత గూగుల్ బుక్స్ నుంచి, పాండిచేరీ హిస్టారికల్ సొసైటీ ప్రెసిడెంట్ శ్రీ నల్లం వెంకటరామయ్య గారు కొంత సమాచారాన్ని అందించారు.  యానాం లో ఉన్న పాతతరం వ్యక్తులు తమ అనుభవాలను చెప్పారు.  మరియు ఇతర పుస్తకాలు కూడా తోడ్పడ్డాయి.  (ఆయా రిఫరెన్సులను ఎక్కడికక్కడ పుస్తకంలోనే ఇచ్చాను).  ఇది దాదాపు ఓ రెండు సంవత్సరాలపాటు జరిపిన శ్రమ.  మొత్తం సమాచారాన్ని విశ్లేషించి, వ్యాఖ్యానించి, పర్యవసానాల్ని చర్చించి ఈ క్రింది హెడ్డింగులుగా విభజించి, సాధ్యమైనంత మేరకు  పునరుక్తి లేకుండా జాగ్రత్త తీసుకొని రచించాను.  యానానికి సంబంధించిన కొన్ని అరుదైన పైయింటింగ్స్, ఫొటోలను పుస్తకంలో పొందుపరచాను.

1.       ఫ్రెంచియానాంలో సాగిన వాణిజ్యం
2.       ఆనాటి చట్ట వ్యవస్థ
3.       ప్రకృతి భీభత్సాలు
4.       సామాజిక సంస్థలు
5.       ఫ్రెంచియానాంలో జరిగిన బానిసల వ్యాపారం
6.       బాల్యవివాహాలు - శారదాబిల్లు
7.       అప్పటి రాజకీయ చిత్రం
8.       విద్యావ్యవస్థ
9.       ఆనందరంగపిళ్ళై డైరీలలో యానాం ప్రస్తావన
10.   యానాం ఫ్రెంచిసమాధులు చెప్పే గాధలు
11.   యానాన్ని పరిపాలించిన పెద్దొరలు
12.   తెలుగుభాషకు సేవలందించిన ఫ్రెంచి దేశస్థులు
13.   ఆనాటి సామాజిక వ్యవస్థ
·         ముస్లిములు – మసీదు చరిత్ర
·         క్రిష్టియనులు – చర్చి చరిత్ర – వివిధ చర్చిఫాదర్లు – బొటానిక్ గార్డెన్ ఆఫ్ యానాం
·         హిందువులు – అలనాటి కులగణన, దేవాలయాలు
·         1767 నాటి ఒక అరుదైన యానాం వ్రాతప్రతి
·         ఫ్రెంచి జాతీయౌత్సవాలు – యానాం
·         షోల్ షెర్, మారియన్నె విగ్రహాల ఆవిష్కరణ
·         యానాంలో జరిగిన సతీసహగమన ఉదంతం
·         యానాంకు చైనా బంగారం
·         ఫ్రెంచివిప్లవసమయంలో యానాంలో ఏంజరిగింది
·         ఫ్రాన్స్ మ్యూజియంకు చేరిన యానాం రొయ్యలు
·         అదనపు జడ్జిలుగా స్థానిక పెద్దలు
·         మెడల్స్ మరియు హానర్స్
·         మన్యం జమిందారీ
14.   ఫ్రెంచియానాం ఆర్ధిక స్థితిగతులు
15.   ప్రజాప్రయోజనాల పనులు
16.   అలనాటి సాహితీ వేత్తలు
17.   ఆనాటి ప్రజల వితరణ
18.   ఫ్రెంచిపాలన చివరి రోజులు
19.   యానాం విమోచనోద్యమం
20.   యానాన్ని ఆంధ్రాలో ఎందుకు కలపలేదు?

పై ఇరవై వ్యాసాలు మొత్తం 201 పేజీలు. 14 పేజీల పుస్తకముందు భాగం.  మొత్తం పుస్తకం 215 పేజీలు.

ఈ పుస్తకాన్ని “Colonial History of Yanam”  గా అభివర్ణించవచ్చు.  ఇందులో ఉన్న చాలా అంశాలు ఇంతవరకూ ఏ ఇతర పుస్తకాల్లో లేని విషయాలు.  ఈ పుస్తకం వ్రాయటంలో నా ప్రధాన ఉద్దేశ్యం ఆర్చైవ్స్ లో మరుగునపడిఉన్న చాలా సంగతులను నలుగురుకీ తెలియచెప్పటం.  ఒక రకంగా చెప్పాలంటే “గతించిన కాలానికి దృశ్యరూపం”  (1723-1954) ఇవ్వటానికి చేసిన ఒక ప్రయత్నం.  ఈ పుస్తక రచనకు సుమారు రెండువేలకు పైన ఫ్రెంచి డాక్యుమెంట్లను పరిశీలించి ఉంటాను. నాకు ఫ్రెంచి రాదు.  గూగుల్ ట్రాన్స్లేటర్ మరియు ఆన్ లైన్ ట్రాన్స్ నిఘంటువులు అద్బుతంగా ఉపయోగపడ్డాయి.  నాకు వచ్చిన కొన్ని సందేహాలను ఈ బ్లాగులోనే కొంతమంది మిత్రులు నివృత్తి చేసారు. 

ఇక పుస్తకానికి  మంచి స్పందనే వస్తున్నది.  ముద్రణకు అయిన ఖర్చులో సగం వచ్చినా చాలనే అనుకొంటున్నాను. ఎందుకంటే ఈ పుస్తకం రాసేటపుడు నాకు కలిగిన తృప్తి అంతకన్నా ఎక్కువేనని భావిస్తాను. 

భవదీయుడు

బొల్లోజు బాబా

పుస్తకం లభించు ప్రదేశాలు

వెల: 150/-

1.Student Book Centre,

Main Road,

Yanam 533464

2.Palapitta Books

403, Vijayasai Residency

Salim Nagar, Malakpet

Hyderabad -36

3. bollojubaba@gmail.com