మా అమ్మాయిని ఆసుపత్రి వద్ద డ్రాప్ చేసాను
అక్కడ ఎవరో వృద్ధుని మృతదేహాన్ని
స్ట్రెచర్ నుండి అంబులెన్స్ లోకి
ఎక్కిస్తున్నారు
అతని తెరిచున్న కళ్ళు ఆకాశంలోకి చూస్తున్నాయి
నెలలు నిండిన ఒక స్త్రీ
నడుంపై ఒక చేయి
సహాయక స్త్రీ భుజంపై మరో చేయివేసి
ఆకాశం వైపు చూస్తూ
భారమైన అడుగులతో నడుస్తోంది
నేనూ ఆకాశం వైపు చూసాను
మెట్లదారిలో
ఒక వృద్ధుడు ఉత్సాహంగా పైకి ఎక్కుతున్నాడు
ఒక చిన్ని బాలుడు గెంతుతూ క్రిందకి దిగుతున్నాడు
గగనానికి ఇలకూ మధ్య కుదిరిన అనాది ఒప్పందం
***
డాడీ బై అంటూ మా అమ్మాయి
వాచీ చూసుకొని స్టెత్ సర్ధుకొంటూ
కంగారు కంగారుగా లోనికి వెళిపోయింది
.
బొల్లోజు బాబా
No comments:
Post a Comment