మిత్రులకు ఆహ్వానం
అవకాశం ఉన్న మిత్రులు తప్పక హాజరు అవుతారని ఆశిస్తున్నాను

భవదీయుడు
బొల్లోజు బాబా

A B C D లు

A ఫర్ ఆపిల్ కి
మైనం కోటింగ్ తో
ఊపిరాట్టం లేదు

B ఫర్ బాల్
ఒత్తిడి భరించలేక
లేని గ్రౌండ్ లో ఉరేసుకొంది

C ఫర్ కాట్
బాగ్ పైపర్ వాయించుకొంటూ
గుహ వైపు వెళుతోంది

D ఫర్ డాల్
వాణిజ్య ప్రకటనలకు
తైతెక్కలాడుతోంది

బొల్లోజు బాబా

నన్ను క్షమించవూ......

నన్ను క్షమించవూ......

సంతలో నెమలీకలు అమ్ముతోన్న
ఒక వ్యక్తిని చూసాను

అలా అమ్మటం చట్టరీత్యా నేరమని
అతనితో చెప్పాలనుకొన్నాను

"చిరుగులు పడ్డ మాసిన దుస్తులు
కపాలానికి చర్మం తొడిగినట్లున్న మొఖం
తాడుకి వేలాడుతోన్న పగిలిన కళ్లజోడు
చెప్పులుకూడా లేని కాళ్లతో"
అతని రూపం చూసాకా
చెప్పబుద్ది కాలేదు.

అవసరం లేకపోయినా
ఓ నాలుగు నెమలీకలు కొనుక్కొని
మౌనంగా వచ్చేసాను

నెమలీ నెమలీ
నన్ను క్షమిస్తావు కదూ!

బొల్లోజు బాబా

మోహం

ఆమె నీడ
నగ్నంగా మారి
నన్ను కౌగిలించుకొంది
బిరుతెక్కిన కుచాగ్రాలు
గుచ్చుకొంటున్నాయి

వృత్తిధర్మం ఎరిగిన
వేశ్యలా
నన్ను నేను విప్పుకొని
అర్పించుకొన్నాను

ఖాళీ గవ్వలోని ఇసకలా
కాఫిన్ బాక్స్ లోని దేహంలా
ఆమె నీడలో ఒదిగిపోయి
కొత్తలోకాలకు ప్రయాణం కట్టాను.

బొల్లోజు బాబా

లోకం

చక్కగా పరిగెడుతున్నాడు
అందరూ చప్పట్లు కొడుతున్నారు

ఎవరో దారిపై
నూనె కుమ్మరించారు
జారి పడ్డాడు

లేచి నిలబడి
అందరకూ నమస్కరించి
వెనుతిరిగాడతను

ఓటమి అతనిది కాదు

బొల్లోజు బాబా

మతం

తనతో విభేధించిన
వారిని కూడా దేవుడు
కంటికి రెప్పలా చూసుకొని
రక్షణ కల్పిస్తాడు కదా!

మరి ఆయన భక్తులేమిటి
ఇలా కాల్చి చంపుతున్నారు?

వీళ్ళ చేష్టలకు సిగ్గుపడి
దేవుడు నాస్తిక మతం పుచ్చుకొన్నా
ఆశ్చర్యపడక్కర లేదు.

బొల్లోజు బాబా

ఫ్రాగ్మెంట్స్

1.
ఆకాశం
తన పెదాలకు
ఏడురంగుల లిప్ స్టిక్
కొట్టుకొంది

2.
ఒంపులన్నీ
సరిగ్గా ఉన్నాయో లేదొ
ఆఖరుసారి అద్దంలో చూసుకొని
బయటకు అడుగుపెట్టింది
నెలవంక

3.
యానాం ఎలా వెళ్లాలి
కాకినాడ మీదుగానా రాజమండ్రి మీంచా?

కవిత్వ సంధ్యను ఎలా చేరుకొన్నా
ఆ సౌందర్యం లోంచి
బయటకు రాలేరు.

4.
ఫెళఫెళార్భాటాలతో
విరిగిముక్కలయింది
ఇంద్రధనుసు
నీవు మౌనం దాల్చటంతో

5.
విద్య మద్యం
ఇక్కడ MRP ధరలకే
అమ్మబడును.
ఉరేసుకోవటానికి "పెర్మిట్ రూమ్"
సదుపాయం కూడా కలదు

బొల్లోజు బాబా

అదేహ ప్రేయసి

నీ జ్ఞాపకాలు నిండిన రాత్రివేళ
నిర్నిద్ర దేహం
అస్వప్న జలాలలో పయనించే
గూటి పడవ అవుతుంది.

నీ రూపం, నీ నవ్వు, నీ వీడ్కోలు
నా మూసుకొన్న కనురెప్పల వెనుక
అద్దం ముందు పిచ్చుకలా
రెక్కలు ఆడిస్తూ, పొడుస్తూ,
మిథ్యా ప్రియునితో రమిస్తున్నాయి

బయటకి వెళ్ళిపోండి అని
చెప్పాలనుకొంటాను వాటితో
ఈ భారాన్ని నేను మోయలేను
అని అరవాలనుకొంటాను.

నీ చుంబనంలో బంధీ అయిన
నా పెదవులు తెరుచుకోవు.
నా గొంతులో కూడా
నువ్వే చిక్కుకొని ఉన్నావు.

బొల్లోజు బాబా

ప్రకటన

అమ్మాయి పేరు తేజోమహలట
సంబంధాలు చూస్తున్నారు

పెద్ద అందగత్తె ఏంకాదు
ఒంటినిండా కురుపులు, రోమాలు
మెల్లకన్నూ ఎత్తుపళ్ళు వంకర కాళ్ళూ

ఏ పనీ రాదుట
సోమరి వంకరబుద్దీ అంటారు
జుట్టువిరబోసుకొని దెబ్బలాటలకు దిగటం
స్నేహితుల మధ్య నిప్పులు పొయ్యటం
అడ్డగోలుగా వాదించి గెలవటం హాబీలట

వచ్చే ఎన్నికల్లోగా
ఆమెను ఎలాగైనా ఒకింటిదాన్ని చేయాలట
కట్నకానుకలు భారీగానే ఇచ్చేలా ఉన్నారు

ఏమైనా సంబంధాలుంటే చెప్పండి.

బొల్లోజు బాబా

మూడు అనుభవాలు

మూడు అనుభవాలు ఒక చెవిటివానికి కోయిల పాట ఎలాఉంటుందో వినాలనిపించింది. ఓ కవిమిత్రుణ్ణి అడిగాడు గులాబిపూవులా ఉంటుందన్నాడు. ఒక అందమైన గులాబీని చెవి వద్ద ఉంచుకొన్నాడు మెత్తని పరిమళ స్వరం గులాబి ముళ్ళు చెవితమ్మెల్ని గాయపరిచాయి చేతికి రక్తం వెచ్చగా తగిలింది అనామక కాకి రక్తం ***** ఒక అంధునికి ప్రేమ ఎలా ఉంటుందో చూడాలనిపించింది సాగరంలా ఉంటుందన్నాడో మిత్రుడు వెంటనే సముద్రంలో దూకేసాడతను గవ్వలు, రాళ్ళు గుచ్చుకొని గాయాలయ్యాయి లోతుల్లోకి కూరుకుపోతూంటే ఒక సముద్రగుర్రం తన వీపుపై ఎక్కించుకొని ఒడ్డున దీబెట్టింది ప్రేమంటే అర్ధమైందతనికి ***** ఒక మూగవానికి దేవుడు కనిపిస్తే ఏం మాట్లాడాలన్న సందేహం వచ్చింది చిమ్మెట శబ్దాలలో నీకు సమాధానం లభిస్తుందన్నారెవరో చిమ్మెటలు కిక్కిరిసిన తోటలో ఎన్నోరాత్రులు ఓపికతో ఒంటరిగా ఎదురుచూసాడతను ఓ వేకువ జామున అతను దేవునితో సంభాషించాడు. బొల్లోజు బాబా