ఒక అనాది కథ

ఒక తాగుబోతు
తన అప్రాప్త ప్రేయసికి
ఫోన్ చేసి
ఆమె కట్ చేసిన తరువాత కూడా
మోసం, ద్రోహం అంటూ
ఏవేవో మాట్లాడాడు
ఆ మాటల్లోంచి
అతని ప్రేయసి
నడుచుకొంటూ వచ్చి
అతడిమొఖాన్ని చేతుల్లోకి తీసుకొని
పెదాలపై చిన్న ముద్దు ఉంచి
నడుచుకొంటూ
ఎటో వెళిపోయింది...
***
దేవుడు మనిషిని
స్త్రీ పురుషులనే రెండు సగభాగాలుగా
విభజించి చెరో దిక్కుకూ విసిరేసాడట
తన అర్ధభాగం కొరకు
మనిషి చేసే వెతుకులాట ఇదంతా....
.
బొల్లోజు బాబా