రద్దీ రోడ్డుకు చెరోవైపున
అపరిచితుల్ని తప్పించుకుంటూ
సెల్ఫోన్ మాటల్లో మునిగిన
ఇద్దరు బాల్యమిత్రులు.
ఒకే వీధిలో ఎదిగిన అడుగులు
ఇప్పుడు వేర్వేరు ఫుట్పాత్లపై.
ఒకే నవ్వు పంచుకున్న పెదాలు
ఇప్పుడు వేర్వేరు సంభాషణల్లో.
ఒకరినొకరు చూసుకోలేని దూరం
అంత పెద్దదేం కాదు
రోడ్డు వెడల్పంతే!
కానీ కాలం
ఆ రోడ్డుకంటే వెడల్పైంది.
జీవితం ఒకే దిశలో ప్రవహించే నది
ముందుకే తప్ప
వెనక్కి ప్రవహించదు.
జ్ఞాపకాలు మాత్రం
అడుగున రాళ్లలా
నీటిలో కరగక నిశ్చలంగా!
బొల్లోజు బాబా
No comments:
Post a Comment