ప్చ్

బలాన్నంతా కూడదీసుకొని

దూరంగా విసిరేసిన ఓ స్వప్నం

మెల్లమెల్లగా కనుమరుగైంది

ఎగిరే పక్షికూతలా.

అక్కడ ఆ చీకటి చలిలో

అదిచేసే దుర్భల ఆర్తనాదం

లీలగా వినిపిస్తోంది.

లేదు అవును లేదు అవును అవును.

అవును అదింకా నన్ను ప్రేమిస్తూనే ఉంది.

ఎపుడో ఒకప్పుడు

అది ఓ రెక్కల గుర్రమై

ఎగురుకుంటూ వచ్చి

నన్నెక్కించుకొని

ఆ కొండపై దింపుతాది.

అప్పటికి ఈ ప్రపంచం

ఇంకా లోయలోనే ఉంటుంది.

బొల్లోజు బాబా