నేనట్టాంటిటాంటి ఆడదాన్ని కాదు బావో

ఈ క్రింది వాక్యాలు ఇటీవల చాలా పాపులర్ అయిన ఒక ఫోక్ సాంగ్ లోవి
.
నేనట్టాంటిటాంటి ఆడదాన్ని కాదు బావో
పల్సరు బైక్ మీద రాను బావ
నేనట్టాంటిటాంటి ఆడదాన్ని కాదు బావో
పిలవగానే నేను రాను బావ
నేనటాంటిటాంటడదాన్ని కాదు బావో
నీలాంటోడికి సనువివ్వను బావ
పురుషుడు స్త్రీని ఆకర్షించి ఆమె పొందు పొందాలనుకోవటం ఒక అనాది వ్యవహారం. అలాంటి ఓ సందర్భంలో - నేను మామూలు ఆడదానిని కాదు. నువ్వు పిలిస్తే నేను రాను. జాగ్రత్త చూస్కో మరి అని ఓ చక్కని పడుచు చెప్పటం చాలా అందమైన భావన.
ఇదే వ్యవహారాన్ని దాదాపు1300 సంవత్సరాల క్రితం ఒక ప్రాచీనకవి ఇలా వర్ణించాడు
.
లేతపెదవుల్ని మునిపంటితో నొక్కిపెట్టి
ద్రాక్షలతల్లాంటి కనుబొమల్ని ముడివేసి
“ఏయ్ దగ్గరకొచ్చావో జాగ్రత్త” అంటూ
తర్జని ఆడిస్తూ కీచుగొంతుకతో హెచ్చరించే
కోడెవయసు చిన్నదాని నుండి
దొంగిలించిన ముద్దే అమృతం
సాగరాన్ని మధించిన దేవతలు ఉత్త వెర్రివాళ్ళు (అమరుశతకం)
.
పై పద్యంలో "నేను అట్టాంటిట్టాంటాడదాన్ని కాదు బావో" అనే ఊహ ను మానవ మేధ ఎంతదూరం తీసుకెళ్ళగలదో అంత దూరమూ నడిపిస్తాడు ఆ ప్రాచీన కవి.
అలా రాను అంటూ చూపుడు వేలుతో బెదిరిస్తూ హెచ్చరించే చిన్నదానినుండి దొంగిలించిన ముద్దు అమృతం అట. అంతే కాదు అలాంటి ముద్దుసంపాదించుకొన్న మగవానితో పోల్చినపుడు అమృతం కోసం సాగరాన్ని మధించిన దేవతలు ఉత్త వెర్రివాళ్ళట. ఇది కదా కవిత్వం అంటే.
నేను మామూలు ఆడదాన్ని కాదు అన్న ఊహను ఇంతకు మించిన ఎత్తులకు తీసుకెళ్ళగలిగే కవి ఎవరైనా ఉన్నారంటే అది మళ్ళా ఈ ప్రాచీన కవే అయి ఉంటాడు ఖచ్చితంగా.
.
బొల్లోజు బాబా




అమరుకశతకం