బాధామయ సందర్భం

రోజుకో
కొత్త కల్పన
కొత్త విషం
కొత్త వాదన
హృదయాలలో చేదు నింపుతాయి
మనిషికి మనిషికి మధ్య దూరాలు పెంచుతాయి
స్నేహాలను, బంధాలను, శాంతిని
మలినం చేసి ద్వేషాన్ని వ్యాపింపచేస్తాయి
ఇది ప్రజల్ని విభజించి
ఒకరిపై ఒకరిని ఉసిగొల్పుతుంది

చరిత్రలో ప్రేమ కన్నా ద్వేషమే ఎక్కువసార్లు
కొందరిని ఒకేతాటిమీదకు తీసుకొచ్చి ఉండొచ్చు
ప్రజలను మనం-వాళ్ళు అంటూ విభజించి ఉండొచ్చు
చంపమనో చావమనో శాసించి ఉండవచ్చు
అఘాయిత్యాలను అద్భుతంగా సమర్ధించి ఉండొచ్చు
ఎన్నైనా చేసి ఉండొచ్చు
కానీ
మనిషిని మనిషితో బంధించేది ప్రేమ ఒక్కటే
గాయాలను స్వస్థపరచేది ప్రేమ మాత్రమే

ప్రేమ వైపా, ద్వేషం వైపా
మనమే ఎంచుకోవాలి
మన ఎంపికే
మన భవిష్యత్తు
మన పిల్లలు జీవించబోయే లోకం


బొల్లోజు బాబా