దీపావళి

కవులు దీపాల్లాంటి వారు
దీపారాధనలో
ఒక దీపం వందదీపాలను
వెలిగించినట్లుగా
కవి ఒక ఆలోచనను
సమాజంపై చల్లి
వేనవేల చైతన్య దీపాల్ని
పండిస్తాడు

ఈ ప్రపంచంలో ఎక్కడో, ఎప్పుడో ఏదో ఓ మూలనుంచి
చీకట్లోంచో లేక ఆకట్లోంచో
కవి కాంతి బొట్లుగా కాలంలోకి ప్రవహిస్తాడు
ఆకాశం నక్షత్రయుతమౌతుంది
నేల హరితకాంతుల్ని పొందుతుంది
దారితప్పిన అలలు దీపస్థంభాన్ని కనుగొంటాయి

కవి దీపధారా లేక
దీపమే కవిధారా అనేది
ఎవరూ తేల్చలేరు
ఒకటి మాత్రం స్పష్టంగా తెలుస్తూంటుంది
దీపం వ్యక్తికి దారిచూపిస్తే
కవి సమాజానికి దారి
చూపిస్తూంటాడు

అందుకే నాకెవరైనా
కవి కనిపిస్తే
నడుస్తున్న దీపావళిని
చూసినట్లుంటుంది.

బొల్లోజు బాబా
(నిన్న కాకినాడలో "తూర్పుగోదావరి జిల్లా రచయితల సంఘం" ఆధ్వర్యంలో దీపావళి సందర్భంగా జరిగిన కవి సమ్మేళనంలో చదివిన కవిత)