Tuesday, July 26, 2016

దగ్ధగీతాలు --- Burnt Poems by K. Satchidanandan


నేనో సగం కాలిన కవితను
నువ్వు ఊహించింది నిజమే
ఒక అమ్మాయి ప్రేమ కవితను

అమ్మాయిల ప్రేమకవితలు
అరుదుగా మంటలను తప్పించుకొంటాయి
తండ్రి మంటలు, సోదరుని మంటలు
ఆఖరుకు తల్లివి, అదో అనువంశికం.

కొంతమంది సగంలో తప్పించుకొంటారు
అలా సగం కాలిన వారిని
మనం Sylvia Plath,
Anna Akhmatova
లేదా Kamaladas అంటాం

కొంతమంది అమ్మాయిలు
మంటలను తప్పించుకోవటం కోసం
వారి కోర్కెలను భక్తి ముసుగులో
దాచేసుకొంటారు అలా ఒక మీరా,
ఒక ఆండాళ్, ఒక అక్క మహాదేవి లు పుడతారు.

ప్రతి కన్యస్త్రీ
నిత్యయవ్వనుడైన క్రీస్తుకి వ్రాసిన
ఓ కాలిపోయిన ప్రేమ కవితే

అరుదుగా, చాలా అరుదుగా
స్త్రీ మాత్రమే చూపించగలిగే మెత్తని దయతో
ఎవరో ఒక అమ్మాయి ఈ లోకాన్ని
చూసి నవ్వటం నేర్చుకొంటుంది
ఈ ప్రపంచం అపుడామెను
Wislawa Szymborska అంటుంది.

Sappho విషయంలో:
ఆమె తన ప్రేమకవితలన్నీ మరో స్త్రీ పైనే
వ్రాసుకొంది కనుక బతికిపోయింది.

మూలం: Burnt Poems by K. Satchidanandan.
తెలుగు అనువాదం: బొల్లోజు బాబా

No comments:

Post a Comment